Иш-чара Борбор Азия өлкөлөрүндөгү климаттык тобокелдиктерди, жашыл каржылоону жана туруктуу өнүгүүнү талкуулоо үчүн негизги аймактык платформа болду.

Кыргыз Республикасынын финансы министринин орун басары Ж.К. Дүйшеева «Климаттык каржылоо жана инновациялар» панелдик сессиясында сөз сүйлөп, Кыргыз Республикасынын климаттын өзгөрүшүнө, айрыкча мөңгүлөрдүн эриши, табигый кырсыктар жана суу ресурстарынын азайышы шартында өзгөчө аялуу экенин баса белгиледи. Ал климаттык каржылоо Кыргызстанда өлкөнүн бүткүл финансы-экономикалык системасын трансформациялоонун ажырагыс бөлүгү катары караларын белгиледи.

2023-жылдан баштап Кыргыз Республикасынын Финансы министрлиги Дүйнөлүк банктын колдоосу менен бюджеттин “жашыл” чыгымдарын маркировкалоо системасын киргизүүдө. Бул механизм эки негизги мамлекеттик мекемеде пилоттук фазадан өтүүдө. Бюджеттин "жашыл" чыгымдарын маркировкалоо климаттын өзгөрүшүнө ыңгайлашууга, кесепеттерин жумшартууга жана башка экологиялык артыкчылыктарга багытталган чыгымдарды көзөмөлдөөгө жана системалаштырууга мүмкүндүк берет. Бул ачык-айкындуулукка, натыйжалуулукка жана ресурстарды стратегиялык бөлүштүрүүгө карай маанилүү кадам.

Кыргыз Республикасынын финансы министринин орун басары Ж.К. Дүйшеева климаттык каржылоо,  мейли ал климаттык тобокелдиктерди эсепке алууда, жеке секторду тартууда же санариптик чечимдерди колдонууда болсун, инновацияларсыз мүмкүн эмес экенин белгиледи. Бул контекстте ал RESILAND сыяктуу демилгелердин маанисин белгилеп, Кыргызстандын эл аралык финансы институттары менен өнөктөштүктү бекемдөөгө умтулуусун баса белгиледи.

Кыргыз Республикасы аймакта туруктуу, аз көмүртектүү жана инклюзивдүү экономиканы куруу боюнча тажрыйба бөлүшүүгө, мыкты практикаларды өздөштүрүүгө жана биргелешип иштөөгө даяр экенин билдирди.