Европа бирлигинин колдоосу Кыргыз Республикасында мектептеги билим берүүнүн сапатын жакшыртууга жана жынысына, этникасына жана тилине карабастан бардык балдар үчүн анын жеткиликтүүлүгүн камсыздоого багытталган. ЕБ менен Кыргыз Республикасынын Министрлер Кабинетинин биргелешкен аракеттери билим берүү системасы сунуштаган көндүмдөрдү жана квалификацияларды эмгек рыногунун жана заманбап демократиялык коомдогу жашоонун муктаждыктарына шайкеш келтирүүгө багытталган.

     ЕБ колдоосу Билим берүү жана илим министрлигинин илим, технология, инженерия жана математика (STEM) жаатындагы ишин колдоого, тактап айтканда, санариптик сабаттуулукту, медиа сабаттуулукту жана “жашыл көндүмдөрдү”  илгерлетүүгө багытталган. Максаты окуучуларды келечектеги турмушка натыйжалуу даярдоого жардам берүүдөн турат.

    7 миллион евро өлчөмүндөгү транш 2023-2026-жылдар аралыгында Кыргыз Республикасында билим берүүнү өнүктүрүү стратегиясын ишке ашыруу үчүн Европа Бирлиги тарабынан бөлүнгөн 27 миллион евронун алкагындагы экинчи төлөм болуп саналат.

     “Билим берүү жакырчылыкты кыскартуунун жана туруктуу экономикалык өсүштүн негизги фактору болуп саналат. Европада болобу, Кыргыз Республикасында болобу, балдарыбызды жана жаштарыбызды өздөрү жана коом үчүн гүлдөгөн келечекти калыптандыруу үчүн эртең керек болгон куралдар жана көндүмдөр менен жабдуу өтө маанилүү. Баары үчүн адилеттүү жана инклюзивдүү сапаттуу билим берүү Европа Бирлиги менен Кыргыз Республикасынын ортосундагы өнөктөштүктөгү узак мөөнөттүү негизги артыкчылык болуп саналат”, – деп белгиледи Европа Бирлигинин Кыргыз Республикасындагы элчиси Мэрилин Йозефсон.

      Өз кезегинде, Кыргыз Республикасынын Финансы министринин орун басары Р.С.Татиков Кыргыз Республикасынын Финансы министрлигинин атынан Европа бирлигине стратегиялык өнөктөштүгү жана бюджеттик колдоо программасы боюнча көрсөтүлүп жаткан колдоосу үчүн ыраазычылыгын билдирди.