Кыргыз Республикасынын Президенти Садыр Жапаровдун демилгеси менен Бириккен Улуттар Уюмунун Башкы Ассамблеясы өзүнүн 77-сессиясында тоолуу аймактарды туруктуу өнүктүрүү маселесин артыкчылыктуу деп таанып, “Тоолуу аймактарды туруктуу өнүктүрүү” жөнүндөгү резолюцияны кабыл алган. Бул резолюцияга ылайык, 2023–2027-жылдар Тоолуу аймактарды өнүктүрүү боюнча иш-аракеттердин беш жылдыгы деп жарыяланган. Бул чечим өлкөнүн туруктуу өнүгүүсүнө багытталган бир катар стратегиялык иш-чараларды ишке ашырууга күчтүү түрткү болгон.

Ушул алкактын алкагында 2025-жылдын 4-июнунда Бишкек шаарында өтүп жаткан “Татаалдан – жөнөкөй чечимдерге” деген ураан алдында уюштурулган Мамлекеттик сатып алуулар боюнча VII Эл аралык форум өзгөчө мааниге ээ болууда. Иш-чараны Кыргыз Республикасынын Финансы министрлиги Дүйнөлүк банк жана Азия өнүктүрүү банкынын өкүлчүлүктөрү менен биргеликте уюштурган. Форумдун өткөрүлүшү Бүткүл дүйнөлүк айлана-чөйрөнү коргоо күнүнө да туш келгендиги мамлекеттик сатып алууларда экологиялык туруктуулукту камсыздоо маселесине өзгөчө көңүл бурулгандыгын тастыктайт.

            Форум мамлекеттик органдардын, эл аралык уюмдардын, бизнес жана эксперттик чөйрөнүн өкүлдөрү ортосунда ачык жана конструктивдүү диалог жүргүзүү үчүн маанилүү эл аралык аянтча болуп калды. Иш-чаранын жүрүшүндө мамлекеттик сатып алуулар системасын өркүндөтүүнүн негизги багыттары, атап айтканда, борборлоштурулган механизмдерди киргизүү, сатып алууларды санариптештирүү, эл аралык туруктуулук стандарттарын колдонуу, ачык-айкындуулукту камсыз кылуу жана коррупциялык тобокелдиктерди азайтуу боюнча чаралар талкууланды. Айрыкча, мамлекеттик сатып алуулар системасынын натыйжалуулугун жана эффективдүүлүгүн жогорулатуу үчүн мекемелер аралык өз ара аракеттенүүнү күчөтүү жана институттук өнүгүү маселелерине көңүл бурулду.

            Форумга Жогорку Кеңештин депутаттары, министрликтер менен ведомстволордун өкүлдөрү, эл аралык финансы уюмдары, бизнес коомчулук жана бейөкмөт түзүмдөр катышты. Бул мамлекеттик сатып алуулар системасын жаңылоого жана аны өлкөнүн туруктуу өнүгүүсүндөгү маанилүү куралы катары кабыл алууга болгон жогорку кызыгууну дагы бир жолу тастыктады.